Stories
wooden door and lock

Mann ka Aapa khoye

A short story

*background music- humari atariya pe, aao sawariya…*

*Red lights*

Sofe par hari saree aur gaade neele blouse pehne, sone ke aabhushan se jagmag, ek aurat leti hai, uske maathe par ek badi gol laal bindi hai, ussi laal se uske hont bhi range hain. Ek ladki uss aurat ke pairo ki maalish kar ri hai.

Peeche kaafi saare puraani lakdi ke darwaaje dikh rahe hain. Koi aadha khula toh koi aadha band, kisi ke bahar ek titli mandra rahi hai, toh kisi ke andar ek bhediya shikaar kar raha hai. Beech waale kamre se ek aadmi nikalta hai, safed shirt aur kaali pant, jaise rang sirf chehre se nahi, shareer se bhi udd gaya mahapurush ka. Mahapurush. Vo do kadam aage badha aur idhar udhar jhaankne laga jaise apni izzat dhundh raha ho iss mandi mein. Shayad gum ho gai hogi waise bhi aaj kal haath mein ret si fisal jaati hai aur ye log usko dhundhte hain aurat ki choli mein.

Aapa- arey O Shilpa, ye londe ko bol, itne mein itna he milega, ee taank jhaank na kare nahi toh peeche tezaab ka talab hai.. *Khisiya ke*

Shilpa- Aapa aap bhi na. Ae Shahrukh, kya dhundh raha hai? Ek aur round lagaayega kya?

*Darwaazon ki chaukhat par baithi ladkiyaan hass padti hain, ek ki toh kamre ke andar se hasi aai*

Man- main toh bus.. *hichkichaate hue* meri flight mein abhi time hai so.. main thodi der baith sakta hu?

Shilpa- mujh par baithega? *kataaksh kaste hue* Flight miss karva dungi

Aapa- q le rahi hai bechaare ki, pehle he de ke aaya hai.. *firse sabki hasi chhoot jaati hai* arey baith jaao, sofa khaali he pada hai

*Mahapurush aage badhta hai aur Aapa ke saamne pade akele sofe par apni tashreef rakhta hai*

Man-Paani milega?

Aapa- aay haay, barkhurdaar pyaas lagaane aaye tha ya bujhaane? Rajjo bhi kamaal ki cheej hai. Ja Shilpa iske liye paani le aa thoda

Man- Aap kitne saal se hain yahaan

Aapa- *Sunte he Aapa ki aankhein button si badi ho gai aur samandar si gehri*  kahaan?

Man- I mean, ye profession mein

Aapa- profession! *Paas mein pade hukke ka ek qash lagaate hue* hum toh zehen mein bun chuke they, azaan-e-azaadi, unke ek labz ne firse humein kaid kar dia

Man- main samjha nahi

Aapa- samajhna q hai?

Man- bus aise he, jaanna chahta tha ki ye char diwaaro ki kahaani kya hai

Aapa- NGO waale ho? Ya policewaale? Sting operation karne aaye ho? Ya humdardi dikhakar ladki bhagaane?

Man- aap sab par aise he shaq karti hain ya main kuch khaas hu?

Aapa- *tirchhi aankhon se ek chhoti si Muskaan, labo ke kone se chehre par aati hai par pata nahi chalta ki gussa hui ya nadaaniyat se khush*

Man- Kahaaniyon se dar lagta hai?

Aapa- *Cheekh kar apna varchasv dikhaati hai* Shilpa, kahaan mar gai? Ek glass paani lene gai hai ya gaand marvaane, saali kuttiya kab seekhegi hukum manna?

Shilpa- arey I aapa, aap bhi na, *jaise aapa ka chillana maa ki mamta thi roz ki* aapke liye paan bana rahi thi, ye lo

*ek hath se paani ka glass mahapurush ko dia aur dusre hath se hara paan Aapa ko khilaya, fir pyaar se hukke ki table par pada safed rumaal uthaya aur Aapa ke hothon par lagaya. Paan se nikli laali, rumaal par aa gai aur Shilpa vaapis jaake Aapa ki maalish karne lag gai*

Aapa- 10 saal ka tha main, Kanpur mein, jab mere baap ko samajh aaya, kinnar paida kia hai. Kya naam bataya tumne apne?

Man- Sagar

Aapa- Nikaal diye ghar se. 17 ki thi jab professional bani, 22 mein khud ka bizness, aur aaj Aapa kehte hain sab log, *itne mein Shilpa firse khadi hoke ek bartan laati hai taaki Aapa usme paan thuk sakein* salaam thokte hain.

Sagar- lekin q ye? I mean aap naukri kar sakti hain, koi bhi aur kaam karke gujara kar sakti hain, jism ki numaaish q?

Aapa- jism ki numaaish? Tum kya karte ho pehle ye batao?

Sagar- main.,.. main (hichkichaate hue).. main artist hu, painting banata hu

Aapa- *uth ke sherni si baith jaati hain jaise kisi ne neend se utha dia ho* toh tum bhi toh vahi kar rahe ho, haath ka istemaaal, aur kabhi kisi kisaan se pucha hai jism ki numaaiish ya fir sarhad par jawaan se, jism ki numaaish? Saala haraami, ye sab apne jism ko he toh bechte hain, tum karo toh art aur hum karein toh jism ki numaaish

Sagar- Aap gussa q ho rahi hain? Main toh bus samajhne ki koshish kar raha hu ki

Aapa- aur kon dega humein Naukri? Q lagta hai tumhe humme se kisi ne Naukri paane ki koshish nahi ki? Aadhe logo ko Naukri ka jhaasa deke yahaan feka jaata hai. Saala voting rights toh ab jaake mile Naukri denge ye, tumse jaada kamaate hain hum yahaan par

Sagar- toh thodi chai milegi?

Aapa- *gussa udd jaata hai aur ek bachhe si masoomiyat aa jaati hai* Khaana lagwa dein?

Sagar- nahi nahi, flight miss ho jayegi. *shirt ki upar waali jeb se ek cigarette nikaalta hai aur Aapa ke hukke se jaake jalata hai par lab par nahi lagata, bus hath mein rakhta hai*

Sagar- aapko nahi lagta ye log baahar jaake ek nai shuruvaat kar sakte hain? Ek behtar zindagi?

Aapa- *sarcastically* tumko nahi lagta tum yahaan aake ek nai shuruvaat kar sakte ho? Ek behtar zindagi? Tumhaare bheje mein ye baat nahi jaati kya? Mahabharat aur Ramayan ke pehle se kothey chale aa rahe hain. Aur samay ke baad tak chalte rahenge, kon si Sarkar hai jo humein Naukri degi ya hamaare baare mein sochegi, ek gareeb aurat hona ek shraap hai aur kinnar hona usse b battar, ye sab meri betiyaan hain, main inka dhyaan rakhti hu, inhe paalti hun, ye jinhein tumhaare samaaj ne nakaar dia

Sagar- *Aapa ko poora nahi karne deta* khareeda hai aapne inhe

Aapa- *gusse mein chehra laal ho jaata hai* qki tumne fenk dia inhe, kabhi kachre mein, kabhi aspataal mein, aur haan khareeda, inke baap se, inke pati se, tuhaare samaaj se, nakad deke khareeda hai bhenchod, aur inki zindagi sudhaari hai maine, inke baccho ko school bhejte hain hum, inko cinema dikhaate hain, chicken khilaate hain,

Sagar- *firse Aapa ko kaat deta hai* kabhi unse pucha unhe ye chahiye ya nahi

*Agar koi lohe ka pahaad sofe ke paas hota toh ab tak Aapa utha ke Sagar par fenk chuki hoti itna gussa ab unki baaton se jhalak raha tha, unki saans aur naak fool rahi thi aur gale par zor dene se nasein jaise dikhne lagi thi*

Aapa- nahi puchenge, ye mera kotha hai, aapa hu main, mujhe pata hai inke liye kya sahi hai aur kya galat, tumhe kya lagta hai maine bahar jeene ki koshish nahi ki? Tumhaare samaaaj mein?

Sagar- toh q chhod dia koshish karna? Aisa kya ho gaya? Ye gussa tab q nahi dikhaya?

*gussa jaise aankho se aansu banke tapakne waala ho aur usse samandar mein zalzala aa jaaye par usko shaant karne ke liye chaand apni taakat lagake samundra ko kuch bataaye, aisi kuch puraani yaad mein Aapa ki dubki lagi*

Aapa- 17 saal ki thi main, 17 saal, ek NGO ne boarding school se padhaai karvaai, NGO mein main Ram se mili, 30 saal ka tha vo, par mera bahut khayal rakhta tha, zarurat se zyaada, mujhe samajh nahi thi aur bus thoda pyaar chahiye tha, usne dikhaya aur main uski ho gai, *Sagar ki cigarette khud se dheere dheere raakh ho rahi thi* kuch dino mein pyaar zeher ban gya, uss zaalim ko bistar mein mardaangi dikhaane ki aadat thi, mujhe kutto ki tarah maarne laga, main dard mein padi rehti par koi nahi aata tha vahaan, meri cheekhein sunne,

*Sagar uth ke Aapa ke paas jaata hai aur cigarette unhe deta hai. Aapa qash lagaati hai aur Sagar unke pairo ke paas zameen par kahaani sunne baith jaata hai*

Aapa- ek bar main vahaan se bhaag gai, aur jaise taise police station pahuchi complaint karne, mujhe bola ki check karna padega kahaan kahaan kya kya hua hai, vahan ek inspector mujhe dusre kamre mein le gya, vo haraami…. fir mujhe hijda bolke unhone lockup mein daal dia, do raat baad Ram aaya mujhe lene, vaapis mujhe pyaar dikhaya aur hum vahaan se nikal gaye, mujhe samajh nahi aa raha tha ye kya ho raha hai,

Sagar- Fir?

Aapa- Hum paidal ja rahe thhey, hum dono ke beech ki khamoshi cheekh rahi thi, chilla rahi thi, 27th Farvary 2002 ki vo raat thi, door se kuch awaajein sunaai de rahi thi, Jai Shri Ram, Allah hu akbar, hum sehem gaye. Tabhi kisi ne peeche se Ram ko zor se maara, vo log meri taraf badhey toh maine bola- main kinnar hu, khuda ke vaaste mujhe chhod dijiye, ye pehle he meri aabru ko chheen chuka hai- mere saamne he unhone Ram ko maar dia aur mujhe le gaye aur yahaan laake fek dia

Sagar- Interesting. I mean sorry. Mujhe nahi pata tha

Aapa- you find this interesting? Am I a muse for your next painting?

Sagar- You know English?

Aapa- Did you think I did not go to school? I told you I went to boarding

Sagar- hmm. *Sagar uth kar chup chaap kamre mein ghoomne lagta hai, haath babuji ki tarah peeche jaake bandh jaate hain jaise ganit ka koi professor black hole ke baare mein gehri soch mein dooba ho* I think you are lying.

Aapa- tumhe kahaani mein dilchaspi thi, maine kahaani suna di, sach aur jhooth toh aankho ka jhonka hai

Sagar- I think what would be an interesting story is this- Boarding se nikalke, tumhe Naukri nahi mil rahi thi, fir tumne socha tum kisi ko fasa lo, toh paise ka kaam ban jaaye, tumhe pata tha Ram NGO mein hai aur tumpar rehem dikhata hai, tumhe bus uss rehem ko pyaar mein badalkar usse fasana tha, tum uske paas jaane lagi, dheere dheere, uske kareeb aane lagi, unhone tumhe NGO mein Naukri dilvaai, par tumhe aur chahiye tha, andar ek soonapan tha, aur ek raat jab tum aur Ram office mein akele thhey, tumne uske paas aane ki koshish ki, *Aapa ek muh se nahi nikalta hai* jab unhone mana kar dia toh tumhe gussa aa gya, tum gusse mein laal ho gai aur cheekhne lagi, Ram dar gaye, vo vahan se nikalne ki koshish karne lage *NAHi NAHI* toh tumne unke upar pehle fool ka vase de maara, fir bahar se danda utha ke laai, aur uspar baras gai, *CHUP HO JAAO TUMHE KUCH NAHI PATA* apne 18 saal ka gussa tumne uss par nikaal dia, haan tum 18 saal ki thi, baalik, aur police se bachne ke liye yahaan bhaag aai. Tumne maar dia usko, Tumne khoon kar dia, kaatil ho tum. Kaatil ho tum Suman Khan kaatil.

Aaapa- *Gusse aur aansu ka baandh toot gaya aur awaaz mein ek Bijli ki cheekh aa gai* haan haan maine maara tha vo bhadwe ko, aur har baar maarungi, saala mujh par haath uthaya usne, main mana karti rahi, mat karo mat karo, ruk jao, dard ho raha hai, fucking consent exists in your books and movies, aur jhooth bol rahe ho tum, roz raat ko kaat khata tha vo mujhe, abhi b nishaan hain ye dekho, maar maar ke sir khol dia tha saale ka aur khoon pia tha maine uska uss raat……. Tumne Suman kaha, tumhe mera naam kaise pata? Kon ho tum? *awaaz mein darr sa aa gaya* Kon ho?

Sagar- Suman Khan, you are under arrest for the murder of Ram Mohanti. Here is the recording and your admission. My name is Sagar Mohanti. He was my father.

Aapa- *Abhi aansu ponchhe nahi they par Sagar ki bachkaani baat par jaanleva hasi aa gai* tum kuch nahi kar sakte mera, Suman khan died when he was abused at the age of 10 by his own uncle and Aapa was born at 18 toh kisko arrest karoge? ye desh ko chakkey sirf shaadi aur byaah mein dikhte hain, baaki din hum sirf train mein nuisance create karte hain, aur peshe waalo ko tumjaise vardi waale roz raat maarte hain, humaari rooh ka intkaam karte hain, nonch daalte hain, tum mujhe haath laga ke yahaan se zinda bahar kaise nikloge?  main Aapa hu. I am the one who balances your society. I am the one who works for those at the bottom. You are nothing but a guilt ridden son who is trying to flex his morale to do something worthy with his waste life. Jaao beta, kisi aur dukaan par khushi khareedo

*Tabhi mahol mein khuspusahat hone lagti hai- Aapa ko arrest kar rahe hain. Arey kisi ne Aapa ko hath lagaya. Tumne suna Aapa aur vo policewaala. Arey Aapa ko bachaao.*

*charon taraf se baalik nabaalik ladkiyan eent aur dande liye gher leti hain*

1- aapa ko jaane dijiye chupchaap nahi toh aap zaaya ho jaayenge aaj

2- dekhiye yahaan khoon kharaba nahi chahiye humein, aap nikaliye

3- Aapa khooni nahi hamaari bhagwaan hain

4- Aapa zindabad aapa zindabad

*Aapa zindabad ke naare lagne lagte hain jaise Bhagat Singh aur sathi angrez ke saamne Hindustan ke naare laga rahe ho. Tabhi peeche se teen ladkiyaan Sagar ko pakad kar zameen par gira deti hain. Ek uske hath bandhti hai toh dusri uski aankhon par patti baandhti hai. Isse pehle ki Sagar kuch samajhta uski shirt ko jaise ishq ki hawas mein kisi ne faad dia aur uski pant utaar di gai. Kuch ladkiyaan toh usko choomne lag gai aur fir kisi ne uske mobile ka agni samarpan kar dia. Hothon ki lipstick ke nishaan liye, Sagar ko bade darwaaze se bahar ka rasta dikhaya gaya*

Aapa- Ye ishq ki dukaan hai, yahaan nafrat ki jagah nahi

*Aapa sofe par let jaati hain aur Shilpa Aapa ki saree pairso se hata, vaapis maalish karne lagti hai. Ladkiyaan apne apne kamre ki chaukhat par jaake baith jaati hain*

*Humri atariya atariya pe, aao sawariya…*

Leave a Reply

Your email address will not be published. Required fields are marked *

Follow by Email
Instagram
LinkedIn
YouTube
YouTube